Riba

Lo Ravit chancaire

Eriam partits en riba de marina, après las quilhas, direccion la bóstia de nuèch. Lo marem mandava d'èrsas de fresc una careça dins la calor. Gominats e vestits de camisas e costumes. Respondian gonèlas cortas, talons auts, mascaratge. Aviam lo fuec, de viure. Morsegar tot. Voliam viure, aicí e aüra. Ràbia e folia dal jovent.

L'ambient i es. Quasi d'a pertot. Entram. Se bala. Se charra. De pistas improvisaias quitament. En gropets. La luna velha sus la jovença.

Danço, per lo fun. Mi platz, m'agrada. Òc. Sautar e far de coregrafias, delirar. Entre amics o solet.

Anam beure un gòto. Fa estranh de se pausar. Quasi destorbant. Coma un apèl. Aspirat.

Cal anar dançar, i tornar. Un besonh. Frenetic.

Lo ritme pica. Sèm aicí e autra part. Lo temps es imortal.

Pi, la veo. Ela.

Me caufa dins lo ventre.

Batibati mai.

Dança, transa. Voirio coma l'enrodar de ieu. L'enveia.

Dins aquel rite sota las estèlas, veire, s'agachar. Lo ros de la sieu pèl. L'escondut. Gardiar sas corbas, imaginar de se sométer per arribar a sos plecs. Desconectar.

Fónder dins la sieu gràcia. Èstre gràcias a ela.

Lo tròç de música s'arrèsta. Quita la pista tant lèu que quitament en cercar, la veo plus. Cerco dals uèlhs. Passa lo temps. Dals autres. Lo fresc es mai fòrt. Suor mesclaia de sucre. Umida.

Quietud destorbaia. Ren es important coma tot.

Mi caufava? Dins lo pitre, l'idea èra plasenta.

Probable que non. A mens d'un astre. Increïble. Tant val de laissar lo dúbit, fa mai bèl ansin. E passa.

​

Lo solelh va se levar. Los passerons cantan ja. La mar ressaca. Lo còr bate. La vita es denans. Lo camin devèrs una autra nuèch, un autre pantais.