A quina òra ?

Pascal Sebat

Lo revelh qui sona: purmèra umiliacion de la jornada? Qu’ac pensas sovent mes doman que serà diferent. Arrés non t’obliga a’u har sonar e ne perderàs pas nat sòu deus qui’t hèn hrèita si n’i ès pas a 7h.
Qu’as verificat l’orari e los lòcs de rendetz-vse. Qu’anaràs au mei pròche de casa: lo parking de Leclerc Auto. Ne saps pas enquèra que t’i trobaràs sol. Lavetz tà un aute punt: lo parking de Carrefour.
Qu’i veiràs monde dab qui charrar: “N’èm pas hèra… D’on vienes, tu? … N’i a autes qui arriban?” Que n’i aurà, ja, en autò o en motò. Ne’n coneisheràs pas nat mes que’vs parlaratz dab aisa. 
7h50, decision presa: “vam blocar Amazon”. Que n’auràs gai: que t’agrada mei qu’ua “operacion escargòlh” suu perif.
7h52: cargar tot çò qui pòts dens l’autò tà blocar: pneumatics usats de las escobilhas de Norauto, un frigò a mitat reciclat, ua barrèra de plastic roj, un tipe qui s’apèra Arnaud... e endavant!
8h, accion:  empachar los camions d’entrar e sortir.
8h15: ua cavalaria de motards dab la placa mascada que’vs vienerà har ajuda.
Que seratz mèstes de l’endret. Que parlaratz dab los liuraires d’Amazon (pas un de blanc):
D’uns “Qu’ei plan çò qui hètz! Perqué n’avetz pas blocat abans? Que’ns mancàvatz!”
D’autes: “Que’ns emmerdatz a nosauts en har aquò: a cada còp ne blocatz pas que lo matin. Qu’acabam mei tard shens que’ns paguen mei!”
Que convieneratz dab eths de non pas plegar abans que los patrons e’us ordonen de descargar.
Que blocaratz tanben lo director de la centrala un par d’òras: un òmi blond e beròi qui harà la gula dens la soa autò.
 
Regla’u sus 5h30, lo revelh: que’t vague d’esdejuar.