Fotbòl

Joan-Marc Leclercq

Ièr, soi anat dambe l’amic Tòlik a l’estadi Petrovski, au ras de Neva, véser un beròi encontre de fotbòl, un dèrbi deus tarribles: Leningrad - Sent Petersborg! L’estadi èra vertadèrament conhit com un trip!
 
Suu l’avenguda Petrovski, èra amusant de véser vielhas Lada parcadas a costat de gròssas Mercedes navas dambe miaire e guardacòs. Las baboshkas que venèvan bocaus de cogomets costejavan venedors a l’amagada de telefonets panats.
 
Los suportaires deus dus clubs son de bon destriar: los de Leningrad an lo peu drin longuet dambe la randa au miei, lunetas “Ray Ban aviator”, la vèsta de jeans, las bragas “patas d’elefant”, quan los de Sent Petersborg son caperats de casquetas de rapaires e tot apelhats en Adidas. A còps un cappelat briagàs que muisha sas popas deu braç ugla capvath lo cledat au ras de la pelosa. Los de Sent Petersborg, dambe lors telefonets, filman l’encontre o s’assabentan de las resultas deus autes encontres de la serada.
 
Los de Leningrad son plan mès tranquilles, que saben plan qu’i a au bèth miei d’eths un policièr de dètz supportaires. En contra, pagan l’entrada a l’estadi una soma ridicula en roblas, çò que’us deisha pro de sòus ende’s crompar una botelheta de vòdca escalorissenta, quan cau aus de l’empont popular de Sent Petersborg, la virada oèst, estauviar totun ende poder s’auherir un bilhet.
 
La resulta estoc pas totun una suspresa, 4-0 ende Sent Petersborg. Cau díser que lo club es proprietat de la poderosa firma GAZPROM e qu’an podut crompar jogaires internacionaus, lavetz que Leningrad, un club municipau, pòt pas beneficiar deus mejans d’una tala entrepresa privada.
 
La partida de retorn se debanarà en març au Gazprom Arena.
 
La setmana qu’arriba, Leningrad encontrarà Sverdlovsk dens l’encastre deu campionat d’Union Sovietica e Sent Petersborg anarà a Ekaterinborg per la Copa de Russia.