Un Encontre

Laurenç Trobat

Aqueste moment que l'avè esperat de 8 òras 30 ençà. A l'argüeit au darrèr deu burèu, que hasè deu tipe subercuentat en tot guinhar au panat la porta alendada. Adara lo cap de servici qu'èra partit entà béver un cafè e fumar ua cigareta. Arthur que sabè qu'estoré tranquille per un detzenat de minutas. Que s'aclapè dens lo fautulh e que's prengó lo telefonet. Qu'at calè saber, e lo mei viste possible !
Quiò ! Que li avè responut ! Qu'èra desolada de s'aver mancat lo chat de ger ser, qu'èra estada retienguda en çò deu medecin, ua codassa de monde qui atenèn de passar abans era, las consultacions qu'avèn pres drin de retard, etc... Lo messatge d'Arthur, que l'avè legut mantuns còps, de tant que'u trobava charmant ! N'avè pas trobat, era tanpòc, quauqu'un de tan plan com eth sus rencontrons-nous.org, tan comprenedor com eth. Eth, que la sabè escotar e compréner, com si estossin brancats sus la medisha frequencia, e patali e patalà...
Dab au còr l'espèr de s'i escader a gahar un rendetz-ve per la dimenjada seguenta e preocupat peu chic de temps qui'u demorava, Arthur que s'amanejè de picar ua responsa. Ne calè pas mancar l'ahar…
Que soscava a quin se vestíre, on la mière e au milierats de causas que poderen aparir a dus èstes aheucats per la passion e lo desir… B'estóre longa l'atenta d'ací a divés ser o dissabte !
L'esperit capvirat per las pensada qui'u corrèvan peu cap, Arthur que premè sus « Envoi du message ».
Sus un burèu vesin, de l'auta part de l'open space (com at disen en francés), un telefonet que's botè a vibrar. Patricia que virè lo cap e qu'espiè l'ecran qui anonciava : « Vous avez reçu un message ».