Vestits.jpg

Vestits

Laurenç Revèst

Sio d'estendre los vestits dals enfants. 23 meses, 6 ans, 10 ans... Cada còup qu'estendo los vestits veo lo temps passar quora mi suspreno de veire los eatges sus las etiquetas. De còups sabo plus qué vestit per cu. Òu, ja èra d'el mas aüra es dal fraire!

 

Los vestits donats tanben recuperats. Aquels que la darriera metrà plus, coma los grands quitèron de metre.

 

Vestits amolonats en sacas. Vestits de fèstas, d'autres immortalats per la fòto dal primier pas dins la nèu en Losera, que lo frairòt portèt après dins l'òrt en se pastissant de tèrra coma la sorreta.

Vestits en espèra. Partença prevista o improvista, per ordenar dins l'armari, sabèm ren. Vendrà un jorn lo temps de netear los vestits la dimenjaia per veire partir la setmana los enfants. E pi partiràn dal bòn, probable.

Coma avèm ben partit dals parents e coma els faguèron.

 

Vestits traucats, usats mas que subrevivon per la campanha. Aquels de depanatge que son de publicitats de magasins, que metèm sota per escondre l'ivèrn e que degun veirà.

 

Tanben, de vestits ancians d'Occitanisme, la malheta blanca amb la crotz occitana e marcaia ''Peti lo fuòc" dal Camèl de fuòc per la Fèsta d'Òc a Besièrs. Aquela al fons gris e marcaia "Me'n bati, foti lo oai" dal MEd'Òc de Montpelhièr, la crotz occitana roja e blanca sus fons negre e d'autres eslogans de Macarèl, escambis dal temps de rescòntres amb d'autres joves de lengas non oficialas o sensa estat d'Euròpa. Vestits dal Centre cultural occitan país Niçard e Alpenc e de la ràdio nissapantai.com amb l'escritura de Ben...

20 ans après los remeto d'unos totjorn en estat. D'arbres testimònian de ma militància. De còups d'escolans los veon d'estiu quora fa caud.

 

Al sens pròpri o figurat, la vita nos fa portar ben de vestits...