©2019 par minutina. Créé avec Wix.com

Sòfia Antípolis

Lalin Montanhac

Camins que virolean sensa s'arrestar. De noms qu'an donat a las rotondas, que senton bòn l'occitan provençal, La Chapa, Lei Bolhidas, Lo Brusc (temptativa de deformacion en Brucs), Lei Messugas, Lei Clausonas (temptativa de deformacion recenta en Claussones), La Farigola, L'Avelanier..., noms provençals, aquò, òc. Coma lo sieu centre ipotetic, lo masatge de Garbejaire-Aut Sartòu (temptativa de deformacion en Carbejaïre). 

Per lo rèsta, de noms de quartiers coma Lo Fugueiret. Gaire de mai. Es lo monde entier qu'es aicí. E la lenga es inexistenta. Enfin, invisibla.

 

Vira, la còla de'n fàcia es ont sès. Diau. Ont se trobar entre la Vau Granier e la Vau Masca? Dins aquels "vaus", valats, valons, valieras percorreguts per los rius La Braga (temptativa de deformacion en Prague e Braque ! art e internacional obliga...), La Bolhida, La Vaumasca. Dificil de trobar una mapa. Es ver que veno de sautar d'una comuna a una autra, alora an gaire de coordinacion per armonizar?, possible. 

 

Impression de passar d'un imòble de burèls a una selva de pins. E vice versa. Una usina d'auta tecnologia al mitan, farmeutica o de logicials. Plen de camins en mitan per las veituras. De quistes pelucres a pè. De rares a velo. 

Un centre d'espòrts aicí, un òste de luxe ailí. Al mens tres gòlfes. Naturalament. L'equitacion, possible, calria demandar. 

 

Un triangle d'enluec entre Niça, Cànoa e Grassa. Poiria èstre Califòrnia, una granda avengüa de Niça que va devèrs l'oèst se sòna ansin, un quartier de Cànoa parier. Silicon Valley occitana. Primier tecnopòl de França e d'Euròpa. 

Aicí, poiria èstre l'Africa dal Sud, Austràlia. 

La "Florença dal sègle 21en" se ditz. 

 

Sòfia Antípolis al nòrd, que còpia Antíbol al sud, per lo nom, existe ben, mas sensa existir. Un centre vuide. Al mitan de ren, entre quatre ponches cardinals, de comunas. Vauboa al nòrd, Biòt a l'èst, Antíbol e Valàuria al sud, Mogins a l'oèst. 

Sembla lor virar l'esquina. Es sus l'esquina mas a costat. Al centre sensa centre totun.

Existon totjorn aquelas vilas. Es una autra vila nòva que Vauboa poblaia ela per de gavòts, coma Valàuria per de ventimilhoses e Biòt per d'onelhans (coma Lo Canet Ròcavila), segonda mitat dal 1400 començament dal 1500. Aquestas tres bastidas urbanas tardivas de l'èst occitan. A l'iniciativa de preires de la potenta abaïa de Lerins per las doas primieras. Mas Sòfia es una creacion urbana, coma Vauboa. L'istòria se repeta. Amb lo santpaulenc Peire Laffitte, a l'òbra, al passage escolan al temps de l'escòla dirigia per Celestin Freinet. Enfin, me va gaire ajuar de tornar trobar lo mieu camin de saber aquò. Se posquèsso demandar a quarqu'un. 

 

Es una autra vila, sensa comuna ni Ostal de vila, dins l'esparpalhament adobat per los vilars ancians coma Vilabruc. D'escòlas sovent reputaias. E de pins. Ai vist passar una persona mas a partit d'un autre costat. Vau ren li córrer a l'après... 

 

Sabo qu'i son de monde venguts dal monde entier, dins una vila nòva facha per els. Mas al mens trobar a parlar per demandar lo camin. La veitura i es reina. Ges de tram. Benlèu un bus-tram. E ges d'endrech per s'arrestar demandar. Un parcatge vuide d'umans. 

Las vias son totas tòrtas, mitat en crèstas mitat en valonèls. De busses, òc. 

Ont se tròba la populacion? Tè, sio dins una androna. Cal tornar. E encara de pins. 

Fòra Garbejaire, lo monde es autra part. A Mogins, vila explosaia, los rics entorn de l'estanh de Fònt Merle. D'autres dins una autra vila nòva creaia: Mogins Aut. Es un sembla vilatge ancian sus un suc, noms d'estil tradicional, carrieras circulàrias e tot. Mas tot es nòu. Coma per los obriers amb Carròs lo nòu rapòrt a Carròs. 

Senon Antíbol, a Valàuria, a Biòt o mai luenh. Mas aicí, ont sio. De diau ! 

 

Es un endrech per se pérder, per aver l'impression d'èstre autra part qu'en Provença mas es ben la Provença dal futur, sembla. Per ieu, per fortuna, es plus la Còsta d'Azur. Es la tecnologia per demorar dins l'ambient, lo GPS, que me va sortir de la panaia. 

 

Exotic al final, òc. 

Ai trobat una mapa papier que mai tardi. 

 

Imatge: Google maps