Los V.P.E e los R.P.P
Cercaval
O avètz ausit ? Aquò’s lo quite president qu’o diguèt clarament : i a causas essencialas e causas non essencialas.
E cossí nomenar los que fan aquelas causas ? En seguissent la logica : los Vertadièrament Plan Essencials e los autres, los paures pas essencials.
Los primièrs, son eles que se van ocupar intelligentament de l’Intelligéncia Artificiala, subretot per bastir de logicials complicats per apasturar las maquinas. Per çò qu’es de fabricar los automats, son los quites robòts qu’o farián, pas besonh d’umans.
Pels segonds, e ben que cresètz ? Aguèssetz pas un Q.I. performant, adieu l’amic ! Avèm pas besonh de vos. Alara, cap de trabalh : cap de revengut, cap de mejans per viure, pas de qué manjar (nimai per beure pecat !) e, solide, pas de qué se manténer en bona santat. Fin finala, acabaretz per trapar un marrit babau que se passeja empr’aquí e que vos farà passar lèu de l’autre costat.
Una mena de seleccion darwiniana se compliriá per daissar pas que los Essencials.
Atal, pas mai de colcavestits, nimai de paucvals, d’ases badaires, d’artistalha de tota mena, d’aqueles (o d’aquelas per respectar la paritat) que lor manca un cèrcle (o un gran, coma volètz), la societat trapariá una estructura plan omogenèa, plan coerenta, sens l’ombra d’una garrolha o d’un pichon guirguilh, e alara, pas besonh de regulacion policièra o militara. Tanben, se desbrembariá lo jòc democratic, las eleccions (que digús i participava pas mai dempuèi un bèl brieu), las associacions culturalas o esportivas (per qué far ?).
Una granda maquinariá que tendriá de la perfeccion.
- E tu dins tot aquò, ont te veses ?
- Non, cal pas somiar !
Mas tant qu’es encara l’ora, vos aconselhi puslèu de cantar amassa :
« Rebalaires, Poetalhons, Palhasses de totes los paises, unissètz-vos ! »