Al vilatge nòstre, les peluts trabalhan pas, vivon de pauc e an gaire le sòu mas son fumaires. Coma se ditz aicí, erressejan es a dire qu'ensajan de viure del RSA.

 

Ongan Quevinon a dos pòts de Cannabis sativa, polits e fuèlhuts que fan badar Bralhanet son vesin. Les dos s'encontran cada jorn per capvirar le mond e pel tornar margar. Un còp que charravan de flicalha e de libertat, Bralhanet qu'es coquin d'ençò coquin ça ditz : "Malfisa-te, marca-mal se passeja, les gendarmas fosegan de pertot. Amaga tas marijanas!"

 

Tanlèu e per pas botar totes les uòus dins un sol panièr, Quevinon amaga un plant al chai e l'autre al Fustièr, endreit que tusta son òrt, negat d'arromècs e ont degun va pas jamès. Dins la nuèit, Bralhanet que l'aviá pistat li pana le pòt.

 

L'endeman, Quevinon s'avisa lèu de la disparicion. Quina catastròfa, tan valià que li agèsson panat la femna! Justament, ne parla a Alaïs, sa companha, una aluserpida que fa temps qu'a botat la pluma e que li aconselha una estrategia.

 

Dins la maitinada, coma d'acostumat, le Quevinon vetz son vesin, e mina de res ça li ditz : "Ai amagat un plant al Fustièr. Me demandi se fariái pas melhor d'i portar tanben l'autre qu'es al chai". Bralhanet sosca un momenton e s'exclama : "Ben òc que te cal, imagina qu'anguen al chai!" Atal se calcula, qu'a condicion que tornèsse le plant panat al Fustièr, tanplan que li poriá panar les dos.

 

La rusa d'Alaïs es escasuda, de nuèit Bralhanet torna le plant panat. A punta de jorn Quevinon le recupèra e le maitin invictiva son vesin : "Bogre, t'escotarai pas pus, aquesta nuèit m'an panat les dos plants. Me demandi s'es pas tu!" Le Bralhanet n'es estabosit, i compren pas res de res, se demanda plan qui poriá èsser le panaire…