©2019 par minutina. Créé avec Wix.com

Pichina Folia

Lalin Montanhac

Lo programa dal concors ven de tombar. 

Es fach, sabèm a quinas forcas caudinas devèm donar nòstre temps e energia per esperar melhor. Curiós de saber coma se va installar aquò, per una primiera. L'Agregacion. 

Mas tabacar primier. Tempier. Tempèsta. 

Estudiar. E mai chalrà viatjar, expausar lo sieu trabalh se vau a las formacions... 

 

Qué van far los autres, quant i seràn a se presentar? Los mai ancians auràn mai de gaubi, los joves de vam e de frescor?

Aver las bònas respòstas per ce qu'es esperat. Préner en la sieu fòrça e èstre a talh, al just. 

Saber gerir la sieu fatiga, lo beure e lo manjar quitament, mas eschampar d'aiga ren tròup sovent, èstre estrategic. E pi una part de desconoissut, d'uman, d'astre. Dúbits. 

Saber sus que serem atacats, nòstres ponches febles. Que se nos conoisson, o veson nòstres trabucs, chalrà èstre dins una autra via. Contornar. Per ren èstre bistornat. 

 

Profechar de tot, costat trabalh, pensar a aquò primier. Comandar los libres, trobar las edicions ancianas, cerchar ont son disponiblas las analisis, per las apréner. E aver lo sieu sentiment pròpre subre. Aver de reculaia. 

 

Gerir la vita de familha amb aquò. Suspénder l'associatiu, lo benevolat. E encara. 

Pensar qu'es una question de subrevita. Òc. De subrevita. Dins lo quotidian dal trabalh, ai sovent l'impression d'èstre en subrevita. Tant de projèctes de menar. Tot es de far, quasi. S'existon ben d'òbras ja, n'i a talament de complir. Corsa còntra la mòstra. Lo mendre blanc dins l'emplec dal temps deu èstre eficaç. Coma aquels ancians que parlan encara la lenga occitana e que mòron dins l'anonimat. 

 

Es un enjuec. Chal i anar, per sostenir la demanda ja. Perqué se gaire son interessats, lo nombre de pòstes... demenirà. E aurem plus de figura. Qu'èra una revendicacion anciana. E eriam dins l'espèra. E serem esperats al mendre viratge. Qu'un objectiu. Un. 

 

Sordat? Possible? 

Los trachels de construccion se veiràn plus un còup finit. Serà achabat. Eissubliat. Renaissut. 

 

Mas, de tant en tant, lo quotidian repren. Plan plan. De mai en mai. Concret. 

Inagotable. 

E s'alunha l'objectiu. Arrestar lo temps. Necessari. Se desfar d'una pression per una tòca. 

Sio ja actor dal mieu quotidian? Ren tostemps. Mas qué!? 

 

De diaul. Aquela de bicicleta! Ai depassat lo relambi d'inscripcion.

Imatge: Desconegut