©2019 par minutina. Créé avec Wix.com

Nuechofil

Lalin Montanhac

Esto matin, me sio fach drevilhar a 13h. L'autre jorn èra Balestre, l'entrepreneire de biscòtas d'Anòt. Avèm parlat de se veire a Gaidan. 

Mas esto còup, es per una telefonaia d'una jova collèga, amiga de la familha. Per ieu ? Non. Sus lo còup ai repensat a l'òbra d'art erigia e inauguraia per comemorar la resisténcia en las valaas dals Palhons, sus lo camin entre Cantaron e Blausasc. 

Un plaser. Solet. Encara. Que passa lèu, coma las veituras passant aurian dich lo grop dals Neg Marrons. Sio ready. 

 

Dejuno-disno. Istòria de me repegar a un semblant de cronologia normala. Tiro la cortina, la lutz dal jorn me pica los uelhs. 

Esto sera, serà coma aier. Penso. Sio las d'enquistar. Òc. Anar enregistrar los gents que parlan occitan, patoàs dison sovent encara, vivaroalpenc. Ai ja passat lo departament dals Alps d'Auta Provença. Passo de temps per camins. E ambals ancians. Parlar. Enregistrar. Collectar coma se ditz tecnicament. 

Mas i es talament de far e de far encara. E quora escotar aquels enregistraments per los esplechar ? Dal mieu viu e seràn los autres que o faràn deman ? Seria frustrant de non veire la fin de la mieu òbra començaia. 

 

E la mieu vita, entre parentesis. Collecto la vita dals autres. Testimòni mas ren actor. Nòto. Conservo, analiso. Mas ja quora tot aquò lor serà tornat ? Auràn vist lor trabalh recompensat de m'aver aculhit ? O los descendents seràn interessats ? Testimòni de familha al mens. Non ? 

Son totes vius dins la mieu tèsta encara. Voirio seguir çò qu'an dich, mas lo temps passa. Solet dins l'entrepresa. E l'argent va mai a la campanha de publicitat per un fèsta qu'a una campanha de collectatge. 

 

Passo la nuèch, la mieu amiga, coma dich sus l'album d'Arvèi T de Vorona, genta persona. Quiet. Apasimat. Los lumes de luenh. Una lampa coma solelh nuechenc. 

Una pausa que dura. Sus la ret. L'IRC. Parlam. Lo temps passa, diferent. Escriure. Laissar traça escricha, dins lo fil de la discussion. Qu'en es ges una. D'unos se parlan, per parlar o escambiar, mas d'autres parlan solets. "Cerco frema". "C******? B*****?". "Dial privat, link aquí =>". 

Diau. De qué chapar un virus tanben. Una IST informatica. Mancaria plus qu'aquò. 

 

Charro per lo plaser. Vivalavita sio. Cau7A es d'Alvernhe, se caufa a la lenha e se fa la lenha. Mas chata. Chata d'Alvernhe auria dich Mistral. 

VenUs es pròche de Ventimilha. 

C4 es entre Montpelhier e Cànoa. Delòng lo camin de fèrre, que ditz. Pi Fyzzz69, Gorg.1, Zoobi, WAK, Kezia0025, Shopina... 

Una nuèch, entre escur e sorn, entro. Dins lo secret. Sabo faire de peisses automatizats al clavier. Mas cal ren tròup abusar, los bòts son aquí. E calrà se tornar conectar. Quimera sus lo temps. Accelera mai lo temps. Amb de juecs de devinhòla, los bòts nos amusan, se fa de juecs de mots: "La familha Keven a un enfant, cu es ? Alan. 

Parier per la familha Bola. Pitt".

Cu son los umans darrier los claviers ? Existon solament ? 

 

La man informatica tendua es trapela. Dins un monde parallèl, i sio totjorn. Benlèu. Dins una autra vita. Conectat, desconectat, en cerca dal temps que passa. Ecran, apartament, escapaia per pilhar lo corrier, supermercat o rar apuntament coma sortia. Sio entrat dins la Mairitz, la Matrix. D'octets de 0101 fan de memòria benlèu sus quarque serveire. Escriure corch. Giscla après la tòca Entraia. Coma de paraulas dins lo buf dal vent. Coma sus un serveire informatic. Dins un quartier sensa nom, darrier lo beton, entre los imòbles conectats d'aquela grand vila de lumes solets. 

 

/jorn

 

Delete message coz : non conform

Bot_Jacob1CentraliZ

 

Empty space

 

... 

Connecting wait

... 

Welkom hom Neòc

Now chose your pill : (translate) pilula blava o roja ? 

Done: roja 

 

=> Fight ! 

/+*/

 

------------

Imatge: StockSnap