©2019 par minutina. Créé avec Wix.com

Juguets

Lo Roial

Enfant, ai agut una vita normala. Enfant unic, quiet. Classa meana, vita meana. Solitari. 

Me refugiavo dins los juecs. 

De passes de juguinas que venián de quilomètres, d'universes e moneas parallèlas. 

D'indians que desfan los vachiers. Fòra realitat, mai justa. 

Pi ai creissut, los juguets estocats e servats quarque part, en cò dal paire, dins de cartons. Amb un milierats de libres mieus. 

Los mieus enfants naissuts, devo batalhar per que ressortèsson dals cartons las veituras de ferre Majorette. Començan de s'enuiar quora venèm. Encara mai qu'es d'ivern. Sèm jamai estaches television alora. 

En pi avio de playmobils, de Legos. Mas, ont son ?... Los avio vistes un còup al sòlmòrt. 

Impossible de trobar lo temps per i tornar quora venèm en visita. Talament de far. De familha de veire. Manjar. 

Pi, un jorn, per astre passo al trabalh dal paire, e coma decoracion, una veitura de ieu. La reconoisso. 

Lo paire ditz de non, qu'es d'un enfant dal trabalh. Mas ieu reconoisso ben quitament las marcas de la veitura e mai lo pegassolet qu'avio ajustat d'un latz. Me fa ticar. 

 

Memòria raubaia. 

Mai, una impression de transmission de la mieu enfança rota. Per lo plaser ? 

Una part de ce qu'èro e qu'avèm gardat, i es, mas autra part. Gaire luenh. Aver gardat aiçò per ren. Tant qu'avèm de plaça. E en bòn estat. Me disio que lo donario a mos enfants un jorn. Mancat. 

 

Demando mas ges de respòsta. Mensònegues?

Chalrà tornar comprar de juguets. Fa virar l'economia diretz, mas rotlam ren sus l'aur.

 

Lo temps, passa, la maire a sortit un vièlh juguet per far decòr, un fòca, lo bibi se sonava, blau. L'enfanton lo ve. Lo vòl. 

Es de ton paire pichonet. 

L'a. 

Pi las oras passant. Partèm. Fatigat, s'enduerme. De retorn en veitura, e arribats, lo portam. Dobla fila. Descharjo pi las compras e autras sacas. Fa nuèch bèla. Quieta. Sio solet. 

 

Chal parcar la veitura. Ascensor. Correor. E per charriera, sus lo sòl, un tòc de plastic blavet m'atrai l'atencion. Me baisso, èra lo bibi, calat per terra. Retrobat per astre après èstre donat. El tanben. Auria poscut èstre perdut.

Imatge: Werner Weisser