Primera Serada en La Habana

Pèire Tommasi

Passada la primièra jornada de vesita d’aquela ciutat granda, amb la mostor equatoriala : nos afustam per la serada. Sortèm de El Telegrafo, polida ostalariá del centre. A qualques passes de El Parlamiento e de la Fabrica Partagas.

         Una carrièra puèi una de mai... Puslèu de ganèlas, estrechas e luminosas, conflas de monde. A un canton, tombam, cara a cara, sus un cafè grand e polit, decoracions e mòbles de las annadas 50. Un comptador gigant, e darrièr el, una quantitat de botelhas que jamai aviá pas vist fins ara. De ròm, de ròm... e qualques botelhas del demai.

         Nos siétam sus tres cadièras, nautas e encueradas, al comptador. Puèi una piñacolada. Ennaut d’una paret, una television. Una partida de baseball. Los Industriales de La Habana jògan lo campionat national de baseball contra una còla de Santa Clara.

         Atmosfera gaujosa. Es a dire que capitan aqueste ser Los Industriales. Puèi, la pausa. Segonda piñacolada. Tot d’un còp, s’intallan jos la television una còla de musicaires e dançaires, un desenat. E de jogar d’unas salsas. E la practica de dançar. Se’n torna començar la partida de baseball. Anèm ! Una piñacolada de mai.

         Dempuèi la pausa mediana, chapam amb un òme, al comptador el tanben. Grand, metís, pels còrts e clucas redondas sul nas. Un quarantenat d’ans. Règis se sona. Nos aconselha sus tal o tal ròm. "Es la vòstra primièra serada, aicí ? Esperatz !" Se’n va. Un quart pus tard, se’n torna amb tres habaños crompats d’un biais pas tròp oficial, saique.

         Daissam lo comptador, sortèm amb los ròms e los habaños per los fumar, amb lo Regís al cuolh, sul trepador. Discutida gaujosa a l’entorn del Baseball. Nos balha qualquas explicacions sus aquel espòrt ; que en avèm fòrt besonh... Paures franceses que sèm.

         Puèi nos propausa de nos far lo guide agratís de la ciutat per los dos jorns seguents. Dintram. Una piñacolada per la rota...

 

©2019 par minutina. Créé avec Wix.com