©2019 par minutina. Créé avec Wix.com

"Camping Paradise"

Pèire Tommasi

N’i a que dison que se moriguèt, fa un briu, lo camping vertadièr,  lo simple, amb pas que de tibanèls o de caravanas. Es vertat : Quitava pas de decréisser dempuèi d’annadas la frequentacion dels camping istorics e classics. Benlèu la fauta, a l’encòp a l’arribada dels Mobil-Home e de la construccion de campings que semblan mai a de parcs d’attraccions, amb mai d’estelas que non pas dins lo cèl.

         Urosament (fa pas gaire, mai o mens 5 ans) d’unes novèls campaires arribèron amb lors tibanèls dins las ciutat grandas, luènh de las plajas, dels lacs o de las montanhas. Vesèm doncas d’unes intallacions als cairefòrcs o sus los trepadors de las ciutats. Sietats en familha espèran tota la jornada, de còps amb pancartas ont se pòt legir d’unes messatjòts en lengas estrangièras e estranhas ; messatjòts d’amor, saique, perque fan riseta los campaires novèls.

         De tot biais, los daissi tranquilles aqueles. Cada còps que me passegi. E òc : An lo drech a la lor intimitat ! E puèi, soi segur qu’an un fum d’amics per far la petanca o l’aperitiu coma dins los campings d’un còp èra, non !? Soi pas de los que s’immississon dins la vida vidanta qualqu’un mai.

         La rumor ditz que serián venguts en França per batèu, òc. Una croisièra saique. Es curiós de far una croisièra per acabar amb un tibanèl per campejar. M’enfin : Es coma aquò lo monde novèl. Estranhs e imprevisibles.

         Auriái pas l’idèa d’anar en Siria (per exemple, sonque per exemple) per las vacanças. Saique qu’es mai atractiu lo nòstre país que non pas lo lor... Saique.