Manganas III

Cedric Vergalh

Aviam un mes per nautres.

A Marchaprima i avià una cambra per caduna e cadun. Cameras, sextoys, gèls, ordenadors e te sabi ieu èran amagats endacòm.
L'estiu lo celibatari occidental sortìs de sa tuta per contentar son apetìs sexual : las camgirls aviàn un mes per elas.
Sabiai que Filon manejava son afar dins lo respècte de caduna. Si que non, jamai l'auriai pas ajudat per aquò... e s'aurià perduda mon amistat.
Tot parièr per la cama ; de l'èrba, e de la bona, òc, a l'escala artesanala per la venda, anava encara, mas lo demai, non. Aviai vist tant de monde morir en causa de tot aquò... Podiai pas. Vertadièrament.
 
" Ajas un gun, un "reguenh", mai una estafilada al front, que te sonariai Omar Little !, m'avià picanhat Filon. Ooo-mar ! Urosament qu'aimas la shona ! "
 
Un còp sarrats nòstres vestits, banhats e pimpats, nos erem retrobats al salon.
La decoracion se volià classa. Èra middle-class. Lo negre e blanc dominava. I avià d'espaci, limita feng-shui. M'estonarià pas que lo Filon aja la carta de Membre Gold d'Ikea.
Erem a l'esperar en tot fumar, beure e charrar per se melhor descobrir quora tres pòchas comolas de skunk tombèron sus la taula bassa.
 
" Vaquì. N'ai un dotzenat comaqu'. 10€ lo grama. Farem a parts egalas. Normalament avèm un mes. Mas d'en primièr anam tastar : veiratz, es quicòm !, çò diguèt en s'assetar entre Kenza e ieu. Es perfiècha per l'estiu : una montada regulara, agradiva, una arribada al pais dels Bisonors per tranquillament s'ajaçar sus una nìvol d'escruma. Es tras que bona ! Aprèp, al trabalh, "au malh" coma dison aquì ! "
 
Passerem la nuèch a blagar, a escotar de musica, a fumar, a cantar, a beure... e a empochonar l'èrba.
A la poncha del jorn, trabalh complit, tal un trobador, daissèri Sofià me prendre la man per me menar dins sa cambra.
 
Jòc novèl
mi tol l'alba,
l'alba, òc, l'alba

Imatge: Monoar

 

©2019 par minutina. Créé avec Wix.com