©2019 par minutina. Créé avec Wix.com

Instant a nèu

Lalin Montanhac

Fasia frei. Eriam en començament d'ivèrn. De l'endrech se vesia la nèu, entre los serres. Ailí, dintre los Alps. Una benda blanca perdüa. 

 

Eram partits cercar l'Arquitecta. Èra un nom e una adreiça. En aquels temps de modernitat, ni telefòn o telefonet, ren de site internet. 

Sabo los arquitectas "artistas". Mas aquel, cal anar lo cercar per li demandar de trabalhar. 

 

Sembla. 

Anam dins aquesto quartier. Sabètz, que tot se sembla. Los quartiers començats dins los ans 1970. En periferia dal vilatge. Segon un estil copiat-pegat, pseudo tradicional amb de doblatges de peiras que sente lo faus. Esperit vilatge, sensa l'esperit, e a costat lo vilatge. Individualisme e vòte FN probables. 

 

Lo GPS nos indica un camin a doas minutas de pè. Aprocham. Sempre degun d'umans per pausar una question ? 

 

Si. Doas fremas, maire e filha en passeaia. Coma far per entrar, es tot barrat, barrieras, portal automatic? 

Ges de possibilitat d'entrar a pè. Cal far desfilar los noms sus un ecran numeric per sonar après. I anam. De tot trobam, de noms occitans a mai. E de numeros "Apt 007".

Mas lo nom, de l'Arquitecta, nada. 

Una Audi sòrte. Poirio entrar, mas coma sortir ? Cal un bip. Un camion d'òbra entra. Me prepausa ben de passar amb el, mas tornarà ren avans 20 minutas... 

 

Es talament grand dintre, amb de carrieras internas, d'andronas, qu'i es totun una mapa. Son de filanhas de carrats dessenhats amb solament de numeros dintre. 

 

Una BMW entra. 

 

Lo GPS indica que lo numero es dins una direccion. La mapa doas autras... Deu ben i èstre un gardian. Mas es ren indicat dins la tièra de noms. Veso escrich "Intendent". 

N'i a pron. Sòno aquel nom.

 

"- Alo. 

- Sio Sénher E, un particular. Cerco aquel nom. 

- E, ben! Picatz dins la tièra. 

- Ja fach, i es ren... 

- Cercatz lo numero d'adreiça. 

- Nimanco. 

- Alora... Cercatz aquel autre nom, Batel. 

- L'ai ren vist, verifico totun...

Non. 

- Vos fau entrar. Es una vila de color verda en puant. 

- Coma sortir vist que i es manco de portal pedon d'accès liure?

- Sonatz mai, vos dubrirai."

 

E racròcha... Mercés pasmens. Lo portal veitura se duerbe. 

Entram. Es una alinhament de maisons, quasi de corons mas que se vòlon de luxe. 

Ges de maison al bòn numero... 

 

Al final, lo GPS nos indicarà ? 100 mètres de dúbitos e un panèl, gardian. A ? Non, un obrier renòva l'interior, ditz que sembla que lo gardian siguesse estach licenciat. La maisoneta es vendüa per la coproprietat... L'equivalent dal "Sindic de lotiment" es absent. L'intendent ? Sap ren ont rèsta... 

 

Tornam al portal. Avèm cercat de vent. L'Arquitecta ? Perdut dins lo Grand univèrs... 

Tòrno campanear l'Intendent. Ren. Un messatge de fin de tip respondeire telefonic... 

Laisso un messatge. Ren. Me glaça la sang. 

Per fortuna una Lotus entra. Partem. Bòn vent. La nèu es totjorn darrier. 

Imatge: Lukas Bieri