La Cervesa e la marida Fe
Pèire Tommasi
Sietat en terrassa d’un estanquet. Una bruna... Una cervesa de segur, sus la taula. Solelh colcant d’ivèrn, al vèspre. Soi a soscar per lo subjècte de la minutina venenta : Pas cap d’idèia ! Merda !
Sus lo temps e l’ora : Fa un pauc ancian combatent. La politica : Pas jamai ! Tròp sensible, subretot dins lo mitan occitan. Quicòm de risolièr : Ai pas l’enveja (amb aquela puta de migrana, es pas encara vengut lo moment de rire).
Macarèl ! Es pas complicat de trobar 300 mots a escriure. N’i an qu’escrivon d’unes libres cada an. 3 o 4 quasi a l’encòp e dempuèi d’annadas. E ieu : Pas res ! Lo fuèlh blanc.
Benlèu qu’es pas per ieu l’escritura.
Benlèu que cal arrestar e tornar èsser sonque un legeire ; levat qualques commentarís nècis per los aticles dels autres. Es aisit. Anonimes, éh, éh,...
E mai, soi un colhon dels bèls : Ai un corrector de tria. Amb el, las mieunas minutinas passan per bèlas. Es per dire ! E ben, non : Lo fuèlh blanc.
Vesètz, soi acostumat de far aquò d’una tira, sens m’arrestar. Solide ! Mas sens cap de problèma per far aqueles putanièrs de 300 mots. 300 mots, 300 mots !?! Encara una idèia “à la c..” ! Aquò ten pas drech ! Coma a l’escòla : “Prenètz un estilo e un fuèlh. Fasètz lo resumit d’aquel tèxte amb 300 mots, mai o mens 10%”. Te’n foti de resumit, ieu !
Encara un tipe solet, dins lo sieu canton, que decidiguèt d’imposar la minutina. E ara un siti internet per aicestas. Òsca... Macaniche e perque ne’n far pas d’unas vidèos o de teatre. Ten : En vaquí una autra idèia estranha...