Cobrefuec per lo Cachafuec

Lalin Montanhac

Adam se lèva, teletrabalha. E quora a acabat la jornaia. Cobrefuec. 

Per fortuna i son las redifusions de Groland. Li fa pensar a las sagas popularas, brut de realitat. Òc. Jamai auria pensat que la realitat posquèsse lo ragantar. 

Dins lo sieu univèrs las guèrras, las faminas, las malautias, tot aquò èra de ficcion. Mas la realitat immediata, se li èra quasi semblabla a la vita costumiera, èra cambiaia d'a passet. 

Per carrieras las gents èran mai tenduas, per los camins las veituras èran estressaias. L'ambient, l'ària avia un gust de falsa patz. 

Coma se comportar dins aquò? 

La gota dal colibri que fa lo sieu trabalh dins l'immensitat de l'òbra per salvar la planeta. 

Pareisse que poiriam acabar de l'umanitat amb quatre causas : rescaudament climatic, crisi economica, malautias e guèrras. 

Coma concebre que la tèrra es ben finia quora la fin la vesèm ren e que sabèm manco coma se passèt la creacion? 

Calenas (Nadal) èran passaias. Avia laissat lo sap coma per se'n avisar de la lutz. Un lume artificial, mental per gardar espèr. 

Mas aüra una autra causa li fasia defaut. Lo fach que i aguèsson de passatges, impossibles de tapar, per los garris. 

Èra al plan terren e ja una ataca de garris, avia rosigat los sieus bèls libres occitans. Als garris lor plasian totplen las cubèrtas cartonaias. Avian totun minga preferéncia dialectala. Tot fasia ventre bondiu! Lo poison limitava a pena. 

E de mèrdas de garris, de pertot. 

Èra una conspiracion de Gautier d'Isigny ? Amb lo sieu Miquelet Garri?

El èra puslèu Donald. Li auria agradat d'èstre Picsou, mas sensa la vita de racho. 

En esperant un avenir melhor, pleguèt lo sap de Calenas. Èra trist. Lo retrobaria manjat tanben per los garris? Qu'enchaut se calia crebar de la fin dal mond. Mas en esperant... Subreviure amb los garris?