©2019 par minutina. Créé avec Wix.com

Chalets

Cedric Vergalh

Son dos chalets dins Aups crompats per aquela Comuna de Lengadòc dal temps qu'èra comunista
Los enfants de la vila i fan l'escoleta d'esquì l'ivèrn, la classa verda lo printemps e i tornan amb los parents l'estiu còps que i a
Los aujòls i van tanben de temps en quora fòra vacanças escolaras
La Comuna cambièt de cònsol mas aquela politica de vacanças a res-non-còst demorèt
E puèi la Comuna cambièt pas de cònsol e aquela politica s'arrestèt
I èran un detzenat a trabalhar coma emplegats municipals, sià a la cosina, sià coma animator, sià coma director
Venian de la val per la majoritat mas dos o tres èran lengadocians
Dempuèi lo temps avian facha lor vida aquì
Aital lo director s'èra maridat amb una femna del paìs e avian doas filhas que fasian d'estudis
Mas trantalhèt pas tròp a l'anòncia de la venda dels chalets : a 50 ans passats decidiguèt de tornar en Lengadòc, la femna demorèt dins Aups, l'amor èl s'èra esvanit dempuèi un brieu
Los autres preferissian cercar de trabalh
Foguèt un temps onte Comunas e entrepresas facilitavan las practicas de lésers e d'educacion pel biais d'activitats culturalas, la creacion de clubs e d'infrastructuras, la possibilitat de "conéisser" la natura o de "veire la mar"
En legir lo diari local lo lendeman del vòte de la venda dels chalets l'ex-director aprenguèt que per aquela sesilha del Conselh municipal se votèt tanben una subvencion excepcionala de 300.000 € al club professional mai important de la vila
Un detzenat de mercenaris que cambian cada annada e demòran pas mai de doas sasons al club