©2019 par minutina. Créé avec Wix.com

Alrevèrs 1èr, Reborsium Rex

Cristian Chaumont

Autres còp èra un país que lo mond sonavan País Rebors, mestrejat per lo rei grand Alrevèrs 1èr. Avetz segurament remarcat que los reis, totes los reis, sempre son qualificats de  grand, amai sián cortets, rabassòts, o de talha mejana ? Alrevèrs 1èr aquel matin de prima se levèt amb un cap coma una semal e l’autre encara embrumassat.
Aviá passada la nuèch sens tampar nimai un uèlh, vira que reviraràs sus sa colcena. Una colcena de cauquilhas d’ustras que se transmetiá de rei en rei dempuèi de sègles e que caliá sustot pas netetjar jos pena que se demesiguèsse fins a desaparéisser afèt.
Quicòm li pesava sus l’estomac. Aviá engolidas dotze dotzenas d’ustras sens respirar e doblidat que las caliá dubrir e traire de la cauquilha abans de las manjar. De costuma, las cauquilhas la metiá amb las autras dins la colcena. Demai aviá bostifalhat una giga de Tirannosaurus Rex sens la gaire mastegar, amb l’òs que de costuma balhava a son gos preferit. Alrevèrs disiá qu’èra lo crostet que l’escanava.
Tanben èra ernhós. Pr’aquò quitèt lo lièch e d’un pè ranquet s’anèt desbochardir, sas cambas tòrtas, una peluda l’autra non, rasclant la calada. Èra de cambas tòrtas dempuèi que tanlèu nascut son paire, lo rei grand Reversièr XIII, l’aviá quilhat sus un chaval. E coma aquel chaval èra nascut amb las costèlas dèstras a senèstra, e las senèstras a dèstra, lo rei Alrevèrs 1èr aviá las cambas tòrtas al revèrs. Çò que lo geina pas brica – i èra acostumat − despart que lo fasiá enganar e encanissar a cada còp que se cauçava, botant la sabata dèstra al pè senèstrier, la de senèstra al pè destrièr. Lo fasiá garrelejar e de còps que i a espatarrar. N’èra recapi pel demai de la jornada.
Lo mai embestiant èra que los artelhs sabián pas pus ont èra l’ostal. S’i mesclavan. L’artelh gròs crosava lo mejan quand li auriá degut anar prene la plaça del mejanèl. Te fasiá un rambalh vertadièr dins las sabatas sens que lo rei se’n mainèsse brica, despart qualques cotigas que se pensava degut a qualque piuse.

Imatge: Jacky Delville